អភិបាលខេត្តត្បូងឃ្មុំ បានជំរុញ​ដល់​លោកគ្រូអ្នកគ្រូ និងអ្នកពាក់ព័ន្ធ ធ្វេីយ៉ាងណា​ កុំឲ្យសិស្សបោះបង់ចោលការសិក្សា ហើយ​ត្រូវ​ចាប់លេងកីឡា​ ដើម្បីសុខភាព

0
17


ត្ត្បូងឃ្មុំ ៖​ អភិបាលនៃគណៈអភិបាល​ខេត្ត​ត្បូងឃ្មុំ​ ឯកឧត្តម ជាម ច័ន្ទសោភ័ណ បានជំរុញ​ដល់​លោកគ្រូអ្នកគ្រូ និងអ្នកពាក់ព័ន្ធ ធ្វេីយ៉ាងណា​ កុំឲ្យសិស្សបោះបង់ចោលការសិក្សា លេីសពីនោះ​ត្រូវ​ជំរុញសិស្ស​ឲ្យ​ចាប់លេងកីឡា ១ប្រភេទ ឬច្រើនប្រភេទ ដើម្បីសុខភាព ជៀសឆ្ងាយគ្រឿងញៀន និងជាធនធានសម្រាប់វិស័យកីឡាកម្ពុជា ក៍ដូចជាបណ្តុះគំនិតក្មួយៗសិស្សានុសិស្ស ឲ្យចេះស្រលាញ់ និងថែរក្សាបរិស្ថាន ពិសេសសម្អាតសម្រាមទាំងក្នុងសាលារៀន តាមដងផ្លូវនៅក្បែរសាលា ក៍ដូចជាក្នុងសហគមន៍កំពុងរស់នៅ។​ ថ្លែងបែបនេះ​ក្នុង​ពិធី​បិទសន្និបាតបូកសរុបវាយតម្លៃលទ្ធផលការងារអប់រំ យុវជន និងកីឡា ឆ្នាំសិក្សា ២០២២-២០២៣ និងលើកទិសដៅការងារឆ្នាំសិក្សា ២០២៣-២០២៤។

មានប្រសាសន៍​ក្នុង​ពិធី​នោះ​ ឯកឧត្តម ជាម ច័ន្ទសោភ័ណ បានលើកឡើងថា ប្រមុខរាជរដ្ឋាភិបាលកម្ពុជា ក្រោមការដឹកនាំពីសំណាក់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា អាណត្តិទី៧ បានដាក់ចេញនូវ “យុទ្ធសាស្ត្របញ្ចកោណ” ដើម្បីជំរុញកំណើនសេដ្ឋកិច្ច បង្កើតការងារ ធានាសមធម៌ បង្កើនប្រសិទ្ធភាព និង រក្សាចីរភាព។

ឯកឧត្តមអភិបាលខេត្ត បាន​បន្តថា សម្តេចធិបតី ហ៊ុន ម៉ាណែត បានយកចិត្តទុកដាក់យ៉ាងខ្លាំងលើវិស័យអប់រំ ក្នុងនោះ លោកគ្រូ អ្នកគ្រូ ត្រូវបានតម្លើងប្រាក់បៀរវត្សបានកាន់តែខ្ពស់ ជាពិសេសក្នុងឆ្នាំ២០២៤នេះ សម្តេចធិបតី បានធ្វើការបន្តតម្លើងប្រាក់បៀរវត្ស កាំប្រាក់ទៅតាមក្របខណ្ឌ ក ខ និងគ បន្ថែមទៀត ដល់លោកគ្រូ អ្នកគ្រូ និងមន្ត្រីរាជការទូទាំងប្រទេស។

ជាមួយគ្នានោះ​ ឯកឧត្តម ជាម ច័ន្ទសោភ័ណ អភិបាលខេត្ត​ត្បូងឃ្មុំ​ បាន​ថ្លែង​នូវ​ការ​កោតសរសើរ និងវាយតម្លៃខ្ពស់ ចំពោះថ្នាក់ដឹកនាំ និងមន្ត្រីគ្រប់លំដាប់ថ្នាក់នៃមន្ទីរអប់រំ យុវជន និងកីឡាខេត្ត ជាពិសេសលោកគ្រូ អ្នកគ្រូ ទាំងសាលារៀនរដ្ឋ និងឯកជន ដែលបានខិតខំយកអស់កម្លាំងកាយចិត្ត បណ្តុះបណ្តាលធនធានមនុស្ស ដែលជាគ្រឹះដ៍សំខាន់ សម្រាប់អភិវឌ្ឍន៍សង្គមជាតិ។

បេីតាម​លោក អុិន ពៅសម្បត្តិ ប្រធានមន្ទីរអប់រំ យុវជន និងកីឡាខេត្តត្បូងឃ្មុំ បានធ្វើរបាយការណ៍ពាក់ព័ន្ធវិស័យអប់រំ និងកីឡានៅក្នុងខត្ត សម្រាប់ឆ្នាំ២០២៣កន្លងទៅ ទទួលបានលទ្ធផលផ្លែផ្កាយ៉ាងល្អប្រសើរ រីកចម្រើនបោះជំហ៊ានឈានទៅមុខថែមមួយកម្រិតទៀត ក៍ដូចជាបង្ហាញពីផែនការ និងយុទ្ធសាស្ត្រសម្រាប់ឆ្នាំថ្មីនេះផងដែរ​ ៕

LEAVE A REPLY

Please enter your comment!
Please enter your name here