លោក​ គន់ សុភា​ អះអាងថា​ យើងត្រូវចូលរួមគិតគូរ និងកែលំអការអភិវឌ្ឍន៍​ ធ្វើឱ្យខេត្តកំពង់ចាមទាំងមូល ក្លាយជាខេត្តទេសចរណ៍បៃតង បរិស្ថានបៃតង និង​កសិកម្មបៃតង

0
29


ដោយលោក,ប៉ៃ លិន
កំពង់ចាម​ ៖ លោក​ គន់ សុភា អភិបាលរង​ខេត្តកំពង់ចាម​ បានអះអាងថា​ ថ្វីត្បិតតែខេត្តកំពង់ចាម មិនទាន់មានបញ្ហាប៉ះពាល់ធំដុំពីការប្រែប្រួលអាកាសធាតុនៅឡើយ​ប៉ុន្តែ យើងត្រូវចូលរួមគិតគូរ និងកែលំអការអភិវឌ្ឍន៍ទៅលើវិស័យហេដ្ឋារចនាសម្ព័ន្ធ ក្នុងក្រុង/ស្រុក/ឃុំ សង្កាត់​ និងការអភិវឌ្ឍន៍វិស័យកសិកម្មឱ្យបានទាន់ពេលវេលា ដែលចូលរួមចំណែកដ៏សំខាន់សម្រាប់ធ្វើឱ្យខេត្តកំពង់ចាមទាំងមូល ក្លាយជាខេត្តទេសចរណ៍បៃតង បរិស្ថានបៃតង និង​កសិកម្មបៃតង ។​ ​តំណាង ឯកឧត្តម អ៊ុន ចាន់ដា អភិបាលខេត្តកំពង់ចាម​ ថ្លែង​បែប​នេះ​ក្នុង​ទិវាអនាម័យបរិស្ថានជាតិ ២៣ វិច្ឆិកា​ ក្រោមប្រធានបទ «ភូមិឋានស្អាត បរិស្ថានស្អាត សង្គមសន្តិភាព សេដ្ឋកិច្ចរីកចម្រើន» ដែលធ្វើឡើង​នារសៀលថ្ងៃទី​៨ ខែធ្នូ ឆ្នាំ២០២៣ នៅ​សាលាបឋមសិក្សា-អនុវិទ្យាល័យអង្គរ ស្ថិត​ក្នុង​ភូមិអំពិលលើ ឃុំអំពិល ស្រុកកំពង់សៀម ខេត្តកំពង់ចាម​ ។

ក្នុង​ពិធី​នោះដែរ​ លោក​ គន់ សុភា អភិបាលរង​ បានថ្លែងថា​ សម្រាប់ខេត្តកំពង់ចាម គឺយកចិត្តទុកដាក់យ៉ាងខ្លាំងលើគ្រប់វិស័យ ដើម្បីអភិវឌ្ឍន៍ និងភាពរីកចម្រើនរបស់មូលដ្ឋានក្រុង-ស្រុក-ឃុំ-សង្កាត់ ភូមិ នីមួយៗទូទាំងខេត្ត ដែលជាខេត្តសំបូរទៅដោយដំណាំក សិកម្ម។ ដោយឡែកការគ្រប់គ្រងសំរាម សំណល់រឹងទីប្រជុំជន ផ្ដោតសំខាន់ធ្វើយ៉ាងណាត្រូវអនុវត្តន៍ឱ្យបានខ្ជាប់ខ្ជួនទៅលើអនុក្រឹត្យលេខ១១៣ អនក្រ.បក កាន់តែប្រសើរឡើង និងលើកទឹកចិត្តក្នុងការចូលរួម ចំណែកអភិរក្សធនធានធម្មជាតិ ដើម្បីការពារបរិស្ថានក្នុងន័យការពារជីវិតនៅលើផែនដី អាចរស់នៅបានដោយសុខសុវត្ថិភាព និងយូអង្វែង​ ។

ជាមួយគ្នានោះ​ លោក​ គន់ សុភា អភិបាលរង​ខេត្ត​ បានសង្កត់ធ្ងន់ថា​ ក្នុងការប្រយុទ្ធប្រឆាំងនឹងសំរាម សំណល់រឹងទីប្រជុំជន ជាពិសេសសំណល់ប្លាស្ទិក រដ្ឋបាលខេត្តកំពង់ចាម និងអាជ្ញាធរមូលដ្ឋានគ្រប់លំដាប់ថ្នាក់ បានយកចិត្តទុកដាក់ជាអាទិភាពលើការ ពង្រឹងការគ្រប់គ្រងសំរាម សំណល់រឹងទីប្រជុំជន សំណល់ប្លាស្ទិក និងសំណល់គ្រោះថ្នាក់ ដោយធានាឱ្យ គ្រប់ទីប្រជុំជន សហគមន៍ សាលារៀន មានសេវាប្រមូល ដឹកជញ្ជូន និងទីលានទុកដាក់សំរាមប្រកបដោយ ប្រសិទ្ធភាព និងការចូលរួមគាំទ្រពីប្រជាពលរដ្ឋ និងគ្រប់ភាគីពាក់ព័ន្ធ​ផងដែរ​ ៕

LEAVE A REPLY

Please enter your comment!
Please enter your name here